sach bata kaahe ka paikan ye tire tiir men tha
jo maza aur hi zaḳhm-e-dil-e-dil-gir men tha
aah is dil men ḳhuda jaane hua kya varna
nala-e-dil mira Duuba hua tasir men tha
us ki tarif karun main ne kahan paa.i zaban
ḳhubi-o-lutf jo kuchh yaar ki taqrir men tha
aah puuri abhi nikli hi na thi dil se ki yahan
dekhte kya hain ki rauzan falak-e-pir men tha
raat deta hi raha dil ko mire pech pe pech
bal jo vo shoḳh tiri zulf-e-girah-gir men tha
na diya ghusl isi vaste mujh ko pas-e-qatl
main nahaya hua ab-e-dam-e-shamshir men tha
kya bala shauq-e-shahadat tha ki tha hashr ka din
mujh ko vo arsa ki jo zab.h-o-takbir men tha
the kal ash.ar sune ham ne sabhon ke lekin
sab se andaz anokha ghazal-e-‘mir’ men tha
muzhda-e-vasl na pahuncha tha tujhe ‘aish’ to phir
kyuun ifaqa tire kal rang ki tagh.ir men tha
Leave a Reply