noon-meem-rashid

Hama-Ust

khayaban-e-saadi men

ruusi kitabon ki dukkan par ham khade the

mujhe ruus ke chida sanat-garon ke

nae karnamon ki ik umar se tishnagi thii!

mujhe rusiyon ke siyasi ”hama-usat” se koi raghbat nahin hai

magar zarre zarre men

insan ke jauhar ki tabindagi dekhne ki tamanna hamesha rahi hai!

aur us shaam to mursida ki urusi thi

us shokh divani ladki ki khatir

mujhe ek nazuk si saughat ki justuju thi

vo mera naya dost khalid

zara duur takhte ke pichhe khadi

ik tanau-mand lekin fusun-kar

qufqaz ki rahne vaali hasina se shir-o-shakar thaa!

ye bhuka musafir

jo daste ke saath

ek kheme main ik dur-uftada sahra men

muddat se uzlat-guzin tha

badi iltijaon se

is hur-e-qufqaz se kah raha thaa:

”na-jane kahan se mila hai

tumhari zaban ko ye shahad

aur lahje ko masti!

main kaise bataun

main kis darja dil-dada huun rusiyon ka

mujhe ishtiraki tamaddun se kitni mohabbat hai

kaise bataun!

ye mumkin hai tum mujh ko ruusi sikha do?

ki ruusi adibon ki sar-chashma-gahon ko main dekhna chahta hun”

vo parvarda-e-ashva-bazi

kanakhiyon se yuun dekhti thi

ki jaise vo un sar-nigun arzuon ko pahchanti ho

jo karti hain akasr yunhi ru-shanasi

kabhi dosti ki tamanna

kabhi ilm ki pyaas ban kar!

vo kulhe hilati thi hansti thi

ik sochi samjhi hisabi lagavat se

jaise vo un khufiya sar-chashma-gahon ke har raaz ko janti ho

vo takhte ke pichhe khadi qahqahe marti lautti thi

kaha main ne khalid se:

bahrupiye!

is vilayat men zarb-e-masal hai

”ki unton ki sauda-gari ki lagan ho

to ghar un ke qabil banao

aur is shahr men yuun to ustaniyan an-ginat hain

magar is ki ujrat bhala tum kahan de sakoge!”

vo phir muztarib ho ke be-ikhtiyari se hansne lagi thii!

vo boli ”ye sach hai

ki ujrat to ik shahi bhar kam na hogi

magar faujiyon ka bharosa hi kya hai

bhala tum kahan baaz aaoge

akhir zaban sikhne ke bahane

khayanat karoge”

vo hansti hui

ik nae mushtari ki taraf multafit ho gai thii!

to khalid ne dekha

ki ruman to khaak men mil chuka hai

use khinch kar jab main bazar men la raha tha

lagatar karne laga vo maqulon men baten

”zaban sikhni ho to aurat se sikho!

jahan bhar men ruusi adab ka nahin koi saani

vo qufqaz ki huur mazdur aurat!

jo duniya ke mazdur sab ek ho jaaen

aghaz ho ik naya daura-e-shadmani

mire doston men bahut ishtiraki hain

jo har mohabbat men mayus ho kar

yunhi ik nae daura-e-shadmani ki hasrat men

karte hain dil-jui ik dusre ki

aur ab aisi baton pe main

zer-e-lab bhi kabhi muskurata nahin huun

aur us shaam jashn-e-urusi men

husn o mai o raqs o naghma ke tufan bahte rahe the

farangi sharaben to anqa thiin

lekin mai-e-nab-e-qazvin o khullar-e-shiraz ke daur-e-paiham se

rangin libason se

khushbu ki be-bak lahron se

be-sakhta qahqahon hamhamon se

mazamir ke zer-o-bam se

vo hangama barpa tha

mahsus hota tha

tehran ki akhiri shab yahi hai!

achanak kaha mursida ne:

”tumhara vo sathi kahan hai?

abhi ek sofe pe dekha tha main ne

use sar-ba-zanu!”

to ham kuchh pareshan se ho gae

aur kamra-ba-kamra use DhunDne mil ke nikle!

lo ik gosha-e-nim-raushan men

vo ishtiraki zamin par pada tha

use ham bulaya kiye aur jhinjhoda kiye

vo to sakit tha jamid thaa!

ruusi adibon ki sar-chashma-gahon ki us ko khabar ho gai thi

More Poems

Leave a Comment