Abhi Tak Un Ke Wahi Sitam Hain Jafa Ki Khu Bhi Nahin Gai Hai

abhi tak un ke vahi sitam hain jafa ki khu bhi nahin gai hai

vo ranjishen bhi nahin gai hain vo guftugu bhi nahin gai hai

nasheman apna utha na yaan se khizan jo aai to aai bulbul

bahar rukhsat abhi hui hai gulon ki bu bhi nahin gai hai

gai javani to jaae dilbar mujhe hai ulfat hanuz baaqi

vo iltija bhi nahin gai hai vo justuju bhi nahin gai hai

ye rashk-e-bulbul ki jaan dene ko tu abhi se tadap rahi hai

abhi to hai bu-e-gul chaman men vo ku-ba-ku bhi nahin gai hai

‘shabab’ bosa liya jo main ne to kya bigad kar vo shokh bola

adab zara bhi nahin hai tujh ko haya to chhu bhi nahin gai hai

Leave a Comment