Poet
maza shabab ka jab hai ki ba-ḳhuda bhi rahe
buton ke saath rahe aur parsa bhi rahe
mazaq-e-husn-parasti qubul hai mujh ko
agar nigah haqiqat se ashna bhi rahe
nizam-e-dahr juda kar raha hai donon ko
main chahta huun kali bhi rahe saba bhi rahe
kahan se jaan bache jab vo shoḳh-e-sehr-nigah
jafa-shi.ar bhi ho ma.il-e-vafa bhi rahe
mujhe mila hai vo rangin-ada muqaddar se
jo dil men jalva-numa bhi rahe chhupa bhi rahe
chaman-parast vahi hai jis ka zauq-e-salim
gulon ke saa.e men kanTon se khelta bhi rahe
vo rind-e-pak-tabi.at hai aap ka ‘sha.ir’
sharab bhi na piye aur jhumta bhi rahe
Leave a Reply