Hamida Shahin
ik jadugar hai ankhon ki basti men
taare Taank raha hai meri chunari men
mere saḳhi ne ḳhali haath na lauTaya
Dheron dukh bandhe hain meri gaThḌi men
kaun badan se aage dekhe aurat ko
sab ki ankhen girvi hain is nagri men
jin ki ḳhushbu chhed rahi hai anchal ko
kaise phuul vo Daal gaya hai jholi men
jis ne mehr-o-mah ke khate likhne hon
main ik zarra kab tak us ki ginti men
ishq hisab chukana chaha tha ham ne
saari umr sama ga.i ek kaTauti men
harf-e-zist ko maut ki dimak chaaT bhi le
kab se huun mahsur badan ki ghaTi men
Leave a Reply