Haidar Ali Aatish
ruḳh o zulf par jaan khoya kiya
andhere ujale men roya kiya
hamesha likhe vasf-e-dandan-e-yar
qalam apna moti piroya kiya
kahun kya hui umr kyun-kar basar
main jaaga kiya baḳht soya kiya
rahi sabz be-fikr kisht-e-suḳhan
na jota kiya main na boya kiya
barhaman ko baton ki hasrat rahi
ḳhuda ne buton ko na goya kiya
maza gham ke khane ka jis ko paḌa
vo ashkon se haath apne dhoya kiya
zanaḳhdan se ‘atish’ mohabbat rahi
kun.en men mujhe dil Duboya kiya
Leave a Reply