Shakeel Shamsi
ladi hai phulon se phir bhi udaas lagti hai
ye shaḳh mujh ko miri gham-shanas lagti hai
kisi kitab ke andar dabi hui titli
usi kitab ka ik iqtibas lagti hai
vo maut hi hai jo deti hai sau tarah ke libas
ye zindagi hai ki jo be-libas lagti hai
thi qahqahon ki tamanna to aa ga.e aansu
ḳhushi ki aarzu gham ki asaas lagti hai
uTha ke dekh sarabon ke aa.ine ko zara
nadi ke paas bhala kis ko pyaas lagti hai
Leave a Reply