Bashir Badr
kabhi yuun bhi aa miri aankh men ki miri nazar ko khabar na ho
mujhe ek raat navaz de magar is ke baad sahar na ho
vo bada rahim o karim hai mujhe ye sifat bhi ata kare
tujhe bhulne ki dua karun to miri dua men asar na ho
mire bazuon men thaki thaki abhi mahv-e-khvab hai chandni
na uthe sitaron ki palki abhi ahaton ka guzar na ho
ye ghazal ki jaise hiran ki aankh men pichhli raat ki chandni
na bujhe kharabe ki raushni kabhi be-charagh ye ghar na ho
kabhi din ki dhuup men jhuum ke kabhi shab ke phuul ko chuum ke
yuun hi saath saath chalen sada kabhi khatm apna safar na ho
Leave a Reply