baḌa ajiib saman aaj raat ḳhvab men tha
main un ke paas tha sayyara aftab men tha
sadaf sadaf jise DhunD aa.e DhunDne vaale
ḳhuda ki shaan vo moti kisi hubab men tha
idhar se dast o nigah o zaban tamam saval
udhar se ek sukut-e-giran javab men tha
hava men ek adhura fasana kahta hua
ye chaak chaak varaq jaane kis kitab men tha
tumhari bazm se tanha nahin uTha ‘ḳhurshid’
hujum-e-dard ka ik qafila rikab men tha
Leave a Reply