Chand Mein Dhalne Sitaron Mein Nikalne Ke Liye

chāñd meñ Dhalne sitāroñ meñ nikalne ke liye

maiñ to sūraj huuñ bujhūñgā bhī to jalne ke liye

manzilo tum hī kuchh aage kī taraf baḌh jaao

rāsta kam hai mire paañv ko chalne ke liye

zindagī apne savāroñ ko girātī jab hai

ek mauqā bhī nahīñ detī sambhalne ke liye

maiñ vo mausam jo abhī Thiik se chhāyā bhī nahīñ

sāzisheñ hone lagīñ mujh ko badalne ke liye

vo tirī yaad ke shole hoñ ki ehsās mire

kuchh na kuchh aag zarūrī hai pighalne ke liye

ye bahāna tire dīdār kī ḳhvāhish kā hai

ham jo aate haiñ idhar roz Tahalne ke liye

aañkh bechain tirī ek jhalak kī ḳhātir

dil huā jaatā hai betāb machalne ke liye

Leave a Comment