Daulat-E-Dahr Sab Lutai Hai

daulat-e-dahr sab lutai hai

main ne dil ki kamai khaai hai

ek lamhe ko tiir karne men

main ne ik zindagi ganvai hai

vo jo sarmaya-e-dil-o-jan thi

ab vahi aarzu parai hai

tu hai aḳhir kahan ki aaj mujhe

be-tarah apni yaad aai hai

jan-e-jan tujh se du-badu ho kar

main ne ḳhud se shikast khaai hai

ishq mere guman men yaran

dil ki ik zor azmai hai

us men rah kar bhi main nahin us men

janiye dil men kya samai hai

mauj-e-bad-e-saba pe ho ke savar

vo shamim-e-ḳhayal aai hai

sharm kar tu ki dasht-e-halat men

teri laila ne ḳhaak udaai hai

bik nahin pa raha tha so main ne

apni qimat bahut badhai hai

vo jo tha ‘jaun’ vo kahin bhi na tha

husn ik ḳhvab ki judai hai

Leave a Comment