Karamat Ali Karamat
dil ka har ek zaḳhm gahra hai
is se har vaqt ḳhuun rista hai
dam liya ham ne gham ke saa.e men
varna har samt ḳhushk sahra hai
us ko kis tarah main bhula deta
jis ka har dam ḳhayal aata hai
bujh gaya jab se apne dil ka charagh
chandni ka bhi rang phika hai
ik sahara mila hai gham ka hamen
varna duniya men kaun kis ka hai
yuun to kaunain mere samne hain
kaun meri nazar men tujh sa hai
ye bata.e koi ‘karamat’ se
muḳhtalif sab se us ka lahja hai
Leave a Reply