jaun-eliya

Apne Sab Yar Kaam Kar Rahe Hain

apne sab yaar kaam kar rahe hain

aur ham hain ki naam kar rahe hain

tegh-bazi ka shauq apni jagah

aap to qatl-e-am kar rahe hain

dad-o-tahsin ka ye shor hai kyuun

ham to khud se kalam kar rahe hain

ham hain masruf-e-intizam magar

jaane kya intizam kar rahe hain

hai vo bechargi ka haal ki ham

har kisi ko salam kar rahe hain

ek qattala chahiye ham ko

ham ye ealan-e-am kar rahe hain

kya bhala saghar-e-sifal ki ham

naf-pyale ko jaam kar rahe hain

ham to aae the arz-e-matlab ko

aur vo ehtiram kar rahe hain

na uthe aah ka dhuan bhi ki vo

ku-e-dil men khiram kar rahe hain

us ke honton pe rakh ke hont apne

baat hi ham tamam kar rahe hain

ham ajab hain ki us ke kuche men

be-sabab dhum-dham kar rahe hain

More Poems

Leave a Comment