Ishq Ne Khun Kiya Hai Dil Jis Ka

ishq ne khuun kiya hai dil jis ka

para-e-laal ashk hai tis ka

yaad kar kar amal men laata huun

har sukhan ishq ke mudarris ka

chashm-e-saqi ka vasf likhta huun

le qalam haat shakh-e-nargis ka

gham ne piila kiya hamara rang

kimiya-gar ne zar kiya mis ka

zulf dikhla ke dil lapet liya

ab pareshan hai haal majlis ka

tum ne paae ho husn ki daulat

puchhte kab ho haal muflis ka

be-kasi mujh siin ashna hai ‘siraj’

nahin to aalam men kaun hai kis ka

Leave a Comment