Nazeer Qaisar
aaj dariche men vo aana bhuul gaya
main bhi apna diya jalana bhuul gaya
aaj mujhe bhi us ki yaad nahin aa.i
vo bhi mere ḳhvab men aana bhuul gaya
ḳhat likkha hai lekin ḳhat ke kone par
vo honTon se phuul banana bhuul gaya
chalte chalte main us ko ghar le aaya
vo bhi apna haath chhuḌana bhuul gaya
ruuTh kar ik bistar pe donon baiThe rahe
main us ko vo mujhe manana bhuul gaya
belen divaron se lipaTna bhuul ga.iin
mausam apne phuul khilana bhuul gaya
dhuup chaḌhe tak donon ghar men so.e rahe
main us ko vo mujhe jagana bhuul gaya
Leave a Reply