Khwaja Meer Dard
ishq har-chand miri jaan sada khata hai
par ye lazzat to vo hai ji hi jise paata hai
aah kab tak main bakun teri bala sunti hai
baten logon ki jo kuchh dil mujhe sunvata hai
ham-nashin puchh na us shokh ki khubi mujh se
kya kahun tujh se gharaz ji ko mire bhata hai
baat kuchh dil ki hamare to na suljhi ham se
aapi khush hove hai phir aap hi ghabrata hai
ji kada kar ke tire kuche se jab jaata huun
dil-e-dushman ye mujhe gher ke phir laata hai
raah pende kabhu us shokh ke taiin ham se bhi
diid va diid to hoti hai jo mil jaata hai
‘dard’ ki qadr mire yaar samajhna vallah
aisa azad tire daam men yuun aata hai
Leave a Reply