Zia Faruqi
ek muddat se nahin dekhi hai ghar ki surat
gardishen aaj bhi lipTi hain safar ki surat
qafas-e-jan men na rauzan hai na dar ki surat
kaise dekhun main yahan shams-o-qamar ki surat
ab yahi jang ka unvan bhi ho sakta hai
us ne patthar koi phenka hai ḳhabar ki surat
maan ki aghosh se paivand-e-zamin hone tak
a.ine ham ne tarashe hain safar ki surat
makaḌiyan apne hi jalon men phansi baiThi hain
abhi kal tak to na thi ye mere ghar ki surat
roz aḳhbar uThate hain yahi soch ke ham
koi muzhda nazar aa.e to ḳhabar ki surat
ham ‘ziya’ sar ko bacha.en to bacha.en kaise
us ka har vaar numayan hai hunar ki surat
Leave a Reply