Saghar Siddiqui
chak-e-daman ko jo dekha to mila eid ka chand
apni taqdir kahan bhuul gaya eid ka chand
un ke abru-e-ḳhamida ki tarah tikha hai
apni ankhon men baḌi der chhupa eid ka chand
jaane kyuun aap ke ruḳhsar mahak uThte hain
jab kabhi kaan men chupke se kaha eid ka chand
duur viran basere men diya ho jaise
gham ki divar se dekha to laga eid ka chand
le ke halat ke sahraon men aa jaata hai
aaj bhi ḳhuld ki rangin faza eid ka chand
talḳhiyan baḌh ga.iin jab ziist ke paimane men
ghol kar dard ke maron ne piya eid ka chand
chashm to vus.at-e-aflak men khoi ‘saghar’
dil ne ik aur jagah DhunD liya eid ka chand
Leave a Reply