abbas-dana

Aql-O-Danish Ko Zamane Se Chhupa Rakkha Hai

aql-o-danish ko zamane se chhupa rakkha hai

khud ko danista hi divana bana rakha hai

ghar ki viraniyan le jaae chura kar koi

isi ummid pe darvaza khula rakkha hai

ban gae unche mahal un ki ibadat gahen

naam daulat ka jahan sab ne khuda rakkha hai

qabil-e-rashk se vo dukhtar-e-muflis jis ne

tang-dasti men bhi izzat ko bacha rakkha hai

jis ke mahlon men charaghon ka na tha koi shumar

us ki turbat pe faqat ek diya rakkha hai

is se badh kar tiri yadon ki karun kya tazim

teri yadon men zamane ko bhula rakkha hai

surkh-ru ho gaiin tanhaiyan meri ‘dana’

us ne kandhe pe mire dast-e-hina rakkha hai

More Poems

Leave a Comment