Jo Na Hon Kuchh Tashrih-Talab Kam Hote Hain

Anjum Irfani

jo na hon kuchh tashrih-talab kam hote hain

us ke ishare saare mub.ham hote hain

har chehra har rang men aane lagta hai

pesh-e-nazar yadon ke albam hote hain

aise men aa jaati hai apni hi yaad

a.ina hota hai aur ham hote hain

bhulne lagte hain jugnu bhi apni raah

palkon par jab qatra-e-shabnam hote hain

mauj-e-bala jab sar se guzarne lagti hai

mazlumon ke haath hi parcham hote hain

muTThi se phisle hi jaate hain har phal

vasl ke lamhe tar-e-resham hote hain

kya jaane jo divar-o-dar ka hai asiir

rahon men kya kya pech-o-ḳham hote hain

koi purana ḳhat kuchh bhuli-bisri yaad

zaḳhmon par vo lamhe marham hote hain

‘anjum’ jalne lagte hain har samt diye

dard ke hamle dil par paiham hote hain