Jalti Rahna Sham-E-Hayat

Siraj Lakhnavi

jalti rahna sham-e-hayat

phir na milegi aisi raat

kah to ga.i vo nichi nigah

raaz hi rakhna raz-e-hayat

ham kuchh samjhe vo kuchh aur

ḳhamoshi men baḌh ga.i baat

kis ko suna.en puchhe kaun

ah-e-nim-shabi ki baat

ruuh ke munkir jism-parast

sahl nahin irfan-e-hayat

uf ye dast-e-talab aur ham

sab hai vaqt paḌe ki baat

daman se ab munh na chhupa

ja bhi chuki ashkon ki barat

jis ne na paa.i apni panah

kya dega auron ko najat

sher vahi hai jis men ‘siraj’

ḳhud taḌpe ruh-e-jazbat