Kis Ne Koi Sach Likha Hai Ye Faqat Ilzam Hai

kis ne koī sach likhā hai ye faqat ilzām hai

shā.irī mahrūmiyoñ kā ḳhūbsūrat naam hai

be-ġharaz milne kī saarī mantiqeñ jhūTī haiñ yaar

tū jo aayā hai to ab batlā bhī de kyā kaam hai

ab ke maiḳhāne kī miTTī par koī dhabba nahīñ

riñd haiñ TuuTe hue hāthoñ meñ sābit jaam hai

ne shikoh-e-sarvarī hai ne jamāl-e-dilbarī

dil kisī fir.aun-e-be-sāmān kā ahrām hai

Leave a Comment