Poet
dil gham se bhi bezar hai ma.alum nahin kyon
ye aish bhi ab yaar hai ma.alum nahin kyon
aalam hama dildar hai ma.alum nahin kyon
jo gham hai gham-e-yar hai ma.alum nahin kyon
ab husn bhi kuchh samne aane men hai mohtat
ab ishq bhi ḳhuddar hai ma.alum nahin kyon
vo ishq jo har jalva-e-rangin pe fida hai
ḳhud apna talabgar hai ma.alum nahin kyon
kuchh roz se vo ‘kaif’ jo ik gosha-nashin tha
rusva sar-e-bazar hai ma.alum nahin kyon
Leave a Reply