Ezaz Afzal
do ghaḌi saa.e men jalne ki aziyyat aur hai
raste men ek divar-e-sharafat aur hai
ab bahut duuri nahin va.adon ki manzil aa chali
do qadam bas moḌ tak chalne ki zahmat aur hai
damanon par DhunDhiye ab kyuun charaghon ka lahu
ham na kahte the hava-ḳhvahon ki niyyat aur hai
phir basarat ka ta.aqub phir ujale ka safar
Dhal chuki hai raat pal do pal ki mohlat aur hai
ghar se ḳhud nikle the ḳhemon se nikalva.e ga.e
vo pashemani alag thi ye nadamat aur hai
sub.h-e-ishrat ko shab-e-gham ke tanazur men na dekh
vo qayamat dusri thi ye qayamat aur hai
zaḳhm-zaron se to sab nashtar-kade nazdik the
charasazo kya hua kitni masafat aur hai
Leave a Reply