koi rahzan na musafir na shajar ki surat
dekh is ujḌi hui rahguzar ki surat
jaane kab ḳhana-badoshi ke ye din guzrenge
muddaten ho ga.iin dekhe hue ghar ki surat
pahle dukh tha ki sar-e-rahguzar baiThe hain
ab koi ranj nahin ranj-e-safar ki surat
apne hi aks se fursat nahin milti varna
aa.ine men hai kahin a.ina-gar ki surat
itne payab nahin hai ki har ik ko mil jaa.en
ham to rahte hain samundar men guhar ki surat
aaj ankhon men nami hai to ghanimat jaano
qaht-e-girya men kahan dida-e-tar ki surat
beach raste men hamen chhoḌ ke jaane vaale
saath hon lenge tire gard-e-safar ki surat
chashm-e-ibrat se ‘farasat’ men use dekhta huun
kal ye virana tha abad nagar ki surat
Leave a Reply