yuun tiri chaap se tahrik-e-safar TuTti hai
jaise palkon ke jhapakne se nazar TuTti hai
bojh ashkon ka uTha leti hain palken meri
phuul ke vazn se kab shaḳh-e-shajar TuTti hai
zindagi jism ke zindan men ye sanson ki salib
ham se toḌi nahin jaati hai magar TuTti hai
koi jugnu koi taara nahin lagta raushan
zulmat-e-shab men jab ummid-e-sahar TuTti hai
kitne andeshon ki kirchen si bikhar jaati hain
ek chauḌi bhi kala.i se agar TuTti hai
ab siva neze pe suraj nahin aata hai ‘salim’
ab qayamat bhi ba-andaz-e-digar TuTti hai
Leave a Reply