poet

Ai Sanam Sab Hain Tere Hathon Se Nalan Aaj-Kal

ai sanam sab hain tire hathon se nalan aj-kal

surat-e-naqus hain gabr-o-musalman aj-kal

baagh men kahte hain vo laale ka takhta dekh kar

gul khilati hai ajab khak-e-shahidan aj-kal

harf-e-matlab apne divane ka bhi sun ja zara

ho tujhe chhutti jo ai tifl-e-dabistan aj-kal

mausam-e-josh-e-junun hai jama-e-gul ki tarah

khud-ba-khud hote hain tukde jeb-o-dastan aj-kal

peshtar khat se maza tha husn ka ai naunihal

ho gaya daghi tira seb-e-zanakhdan aj-kal

yaad karte hain kisi ke mushaf-e-rukhsar ko

taq-e-nisyan par rakha hai ham ne quran aj-kal

zulfen chhodi hain jo us sayyad-e-gul-rukhsar ne

daam men phanste hain murghan-e-ghulistan aj-kal

haae vo khush-qad pae-gul-gasht ab aata nahin

nakhl-e-matam hai har ik sarv-e-gulistan aj-kal

zoaf ke hathon hue fasl-e-junun men tang ham

ho gaya phansi hamen apna gareban aj-kal

in dinon men zuur hota hai hamen josh-e-junun

bhagta hai chhod kar majnun bayaban aj-kal

jo hasin hai gard hai is badshah-e-husn ki

rahta hai pariyon ki jhumar men sulaiman aj-kal

ainDate hain kaj-adai karte hain ushshaq se

bal ki lete hain bahut gesu-e-janan aj-kal

gulshan-e-alam miri nazron men bagh-e-sabz hai

dekhta huun sabza-e-gor-e-ghareban aj-kal

samna har roz ka hai us but-e-saffak se

ai ‘saba’ allah hai apna nigahban aj-kal

More Poems

Leave a Comment