Zafar Iqbal
aag ka rishta nikal aae koi paani ke saath
zinda rah sakta huun aisi hi khush-imkani ke saath
tum hi batlao ki us ki qadr kya hogi tumhen
jo mohabbat muft men mil jaae asani ke saath
baat hai kuchh zinda rah jaana bhi apna aaj tak
lahar thi asudgi ki bhi pareshani ke saath
chal raha hai kaam saara khuub mil-jul kar yahan
kufr bhi chimta hua hai jazb-e-imani ke saath
farq padta hai koi logon men rahne se zarur
shahr ke adab the apni bayabani ke saath
ye vo duniya hai ki jis ka kuchh thikana hi nahin
ham guzara kar rahe hain dushman-e-jani ke saath
raegani se zara aage nikal aae hain ham
is dafa to kuchh girani bhi hai arzani ke saath
apni marzi se bhi ham ne kaam kar daale hain kuchh
lafz ko ladva diya hai beshtar maani ke saath
faslon hi faslon men jaan se haara ‘zafar’
ishq tha lahoriye ko ek multani ke saath
Leave a Reply