siyah raat ke badan pe daagh ban ke rah ga.e
ham aftab the magar charagh ban ke rah ga.e
kisi ko ishq men bhi ab junun se vasta nahin
ye kya hua ki saare dil dimagh ban ke rah ga.e
vo shaḳh shaḳh niile piile laal rang kya hue
tamam dasht ke parind zaagh ban ke rah ga.e
jinhen ye zo.am tha zamin se tishnagi miTa.enge
ajab hua vahi tahi-ayagh ban ke rah ga.e
milega sab ko apna haq rahenge sab sukun se
magar vo saare va.ade sabz baagh ban ke rah ga.e
ujaḌte hain roz ham basi-basa.i bastiyan
ḳhusha vo log jo makin-e-ragh ban ke rah ga.e
Leave a Reply