dasht-e-vahshat ko phir abad karunga ik din
tu na hoga to tujhe yaad karunga ik din
apne hathon se giraftar karunga ḳhud ko
ḳhud ko main ḳhud se phir azad karunga ik din
aa.ine se main karunga tiri timsal kashid
phir tire aks ko ham-zad karunga ik din
mera dushman kaf-e-afsos malega janan
ḳhud ko is tarah se barbad karunga ik din
main ye sunta huun ki ye kar-e-mohabbat hai savab
main bhi is kaam men imdad karunga ik din
apni har baat pe tanqid karunga ḳhud hi
apne hi aap pe irad karunga ik din
bhuul kar bhi na bhula pa.egi duniya mujh ko
dekhna vo suḳhan ijad karunga ik din
daad ḳhud denge har ik sher pe ‘ghalib’ mujh ko
‘mir’-sahib ko bhi ustad karunga ik din
Leave a Reply