Poet
ab kyuun harim-e-naz men sarmastiyan nahin
ham vo nahin ki aap men vo shoḳhiyan nahin
dil hi nahin jo soz-e-junun se tapan nahin
kya zindagi jo vaqf-e-gham-e-javedan nahin
har-vaqt ab to jaib-o-gareban hain chaak chaak
ehsas ehtimam-e-bahar-o-ḳhizan nahin
ajza-e-hast-o-bud mohabbat men kho ga.e
ik vahm hai so us ka bhi koi guman nahin
kaunain mere panja-e-vahshat ki zad men hain
mere junun ki qaid makan la-makan nahin
go arzu-e-jur.at-e-rindana hai magar
hasil ba-qadr zauq ma-e-arghavan nahin
main pa.emal-e-vada-e-farda zarur huun
lekin fareb-ḳhurda-e-naz-e-butan nahin
ifsha-e-raz-e-ishq ka azm-e-buland hai
‘maz.har’ ab aur taqat-e-zabt-e-fughan nahin
Leave a Reply