nazar ke surḳh Dore dil men utre
musafir daman-e-sahil men utre
fazaon men uḌanen bharne vaale
patange gosha-e-mahfil men utre
khanakte nuqra.i sikkon ke taa.ir
tila.i kasa-e-sa.il men utre
ka.i ḳhanjar nigah-e-ḳhishmagin ke
ba-yak lamha dil-e-bismil men utre
kafan-bar-dosh the ahl-e-mohabbat
baqa ki javedan manzil men utre
na bhule ahd-e-hazir ke taqaze
ghazal jab fikr ki mahmil men utre
‘saba’ ke saath rahmat ke farishte
achanak kucha-e-qatil men utre
Leave a Reply