ab is se baḌh ke mujhe aur kya suhulat ho
main tujh ko yaad karun saans ki bhi fursat ho
faza men sirf tire qahqahe rahen baaqi
aur is zamin pe teri talab salamat ho
tumhare naam pe jhagḌa ho aur is ke ba.ad
ho aisi jang ki jis men miri halakat ho
tire visal ke lamhe bikhar ga.e mujh se
ḳhuda kare ki tire hijr ki hifazat ho
main chahta huun koi rasta sujha.i de
main chahta huun mujhe dusri mohabbat ho
lage hue hain sama.at ki chaplusi men
koi to ho ki jise bolne ki hajat ho
main roz karta huun ‘sahir’ na.i adakari
bhula na duun jo use bhulne ki niyyat ho
Leave a Reply