milti hai use gauhar-e-shab-tab ki miras
li mujh dil-e-sad-para ne simab ki miras
hasrat se tiri chashm ki nargis ne chaman men
paa.i hai kisi dida-e-be-ḳhvab ki miras
yaan jo dil-e-raushan ki vo ḳhali hai ḳhudi se
pahuncha.i falak ne use mahtab ki miras
ik biḌa-e-pan haath se tu apne jo baḳhshe
tuuti ko mile ghaib se surḳhab ki miras
pasang hain la.al us ke bhi jis sang ko pahunche
ik qatra mire ashk ke ḳhunbab ki miras
ro-ro ke miri chashm ne is bahr-e-jahan se
li ḳhana-ḳharabi ke liye aab ki miras
ye dard-o-gham-e-ishq dila jaan ghanimat
pahunchi tiri hub se tujhe ahbab ki miras
dariya-e-mohabbat se ‘muhib’ le hi ke chhoḌi
mujh ashk ne aḳhir dur-e-nayab ki miras
Leave a Reply