siraj-aurangabadi

Charagh-E-Mah Sin Raushan-Tar Hai Husn-E-Be-Misal Us Ka

charagh-e-mah siin raushan-tar hai husn-e-be-misal us ka

ki chauthe charkh par khurshid hai aks-e-jamal us ka

sanam ki zulf ke halqe men hai jyuun jiim ka nuqta

ajab hai khush-numa us ariz-e-gulgun pe khaal us ka

ayaan hota hai jyun-kar sarv paani ke kinare par

hua yuun jalva-gar ankhon men qadd-e-naunihal us ka

juda jab siin hua vo dilbar-e-jadu-nazar mujh siin

juda hota nahin yak aan khatir siin khayal us ka

mujhe hai aarzu dil men tiri chah-e-zanakhdan ki

nahin darkar hauz-e-kausar o ab-e-zulal us ka

giraftar-e-havas kya lazzat-e-didar kuun paave

juda jo kui hua hai aap siin paaya visal us ka

‘siraj’ ai shola-ru hai kaun sa so main nahin vaqif

mujhe kya puchhta hai puchh parvane siin haal us ka

More Poems

Leave a Comment