Harim-E-Naz Kahan Aur Sar-E-Niyaz Kahan

Pandit Jagmohan Nath Raina Shauq

harim-e-naz kahan aur sar-e-niyaz kahan

kahan ka sajda kise hosh hai namaz kahan

mujhe ḳhabar hi nahin hai harim-e-naz kahan

niyaz-mand kahan aur be-niyaz kahan

paḌi hai kya use hasrat zadon men aane ki

ye meri bazm kahan aur vo mahv-e-naz kahan

ye maana husn-e-haqiqat ayaan majaz men hai

magar vo jalva hai ai chashm-e-imtiyaz kahan

ilaaj kis ka karega ye puchhta kya hai

bata.en kya tujhe hai dard charasaz kahan

kabhi to milti thi hijr-o-visal men lazzat

magar bujhi hui dil men vo soz-o-saz kahan

dua.en mangta hai shaiḳh kyuun ma.az-allah

ḳhuda ka naam le tauba ka dar hai baaz kahan

baḌe maze se guzarti hai bada-ḳhvaron ki

ba-juz sharab ḳhayal-e-shab-e-daraz kahan

mila vo be-ḳhudi-e-shauq men maza ai ‘shauq’

junun-o-ishq men baaqi hai imtiyaz kahan