Ya Sitam Kar Ya Karam Chahe so Kar

Poet

ya sitam kar ya karam chahe so kar

chahte hain tujh ko ham chahe so kar

maar chahe chhoḌ mujh ko jiite ji

main na chhoḌunga qadam chahe so kar

bazm men mahrum mat rakh de mujhe

jam-e-mai ya jam-e-sam chahe so kar

kufr ya islam kuchh kar iḳhtiyar

ek hai dair-o-haram chahe so kar

maar kha.unga par aane ki yahan

main na kha.unga qasam chahe so kar

ab to main shikva karunga ho so ho

naak men aaya hai dam chahe so kar

ik ghazal to aur bhi ‘besabr’ tu

is zamin men kar raqam chahe so kar