tum se kuchh kahne ko tha bhuul gaya
haae kya baat thi kya bhuul gaya
bholi bholi jo vo surat dekhi
shikva-e-jaur-o-jafa bhuul gaya
dil men baitha hai ye khauf us but ka
haath utthe ki dua bhuul gaya
khush huun is vada-faramoshi se
us ne hans kar to kaha bhuul gaya
hal-e-dil sunte hi kis lutf se haae
kuchh kaha kuchh jo raha bhuul gaya
vaan kis ummid pe phir jaae koi
ai dil us baat ko kya bhuul gaya
hosh men aa ke suna kuchh qasid
yaad kya hai tujhe kya bhuul gaya
ahd kya tha mujhe kuchh yaad nahin
yahi gar bhuul gaya bhuul gaya
main idhar bhuul gaya ranj-e-firaq
vo udhar uzr-e-jafa bhuul gaya
yaad men ek sanam ki naseh
main to sab kuchh ba-khuda bhuul gaya
khair mujh par to jo guzri guzri
shukr vo tarz-e-vafa bhuul gaya
yaad us ki hai miri ziist ‘nizam’
maut aai jo zara bhuul gaya
Leave a Reply