Zohaib Nazuk
hua kitna mushkil vafadar hona
ki paḌta hai us men bhi bas ḳhvar hona
achambhe se ḳhali nahin baat ye bhi
diya jis ne gham us ka gham-ḳhvar hona
ajab daur men saans ham le rahe hain
ki taklif deta hai bedar hona
qayamat se kam to nahin mere dil ka
ḳhuda ki qasam tujh se bezar hona
nibhane ka yaara nahin hai to sun lo
kisi ka tum ab na ai yaar hona
tujhe us ki taqat ka andaza kab hai
qalam ne bhi sikha hai talvar hona
‘zohaib’ is liye kaam karta huun har pal
faraghat ka matlab hai be-kar hona
Leave a Reply