Arman Najmi
bujhi nahin abhi ye pyaas bhi ghanimat hai
zaban pe kanTon ka ehsas bhi ghanimat hai
ravan hai saans ki kashti isi ke dhare par
ye ek TuuTi hui aas bhi ghanimat hai
nishan numu ke hain kuchh to bisat-e-sahra par
jhulasti jalti hui ghaas bhi ghanimat hai
phir is ke ba.ad tumhari shanaḳht kya hogi
rivayaton ki ye bu-bas bhi ghanimat hai
vo ab bhi milta hai apni ada-e-ḳhas ke saath
ki vaz.a-dari ka ye paas bhi ghanimat hai
Leave a Reply