gardish-e-ab-o-hava janti hai
dil hai kyuun dil se juda janti hai
saans lena hai fana ho jaana
raaz ye barg-e-hina janti hai
kaise raushan hai is andhi men charagh
saari tafsil hava janti hai
yuun dabe paanv chali bad-e-nasim
jaise adab-e-haya janti hai
ru-e-ghuncha pe damak hai kis ki
shabnam-e-abla-pa janti hai
farsh-e-rah ban ke bikhar jaati hai
bu-e-gul dard-e-saba janti hai
hain abas kunj-e-nahufta men tuyur
rasta barq-e-fana janti hai
Leave a Reply