Irfan Sattar
sabhi ye puchhte rahte hain kya gum ho gaya hai
bata duun? mujh se ḳhud apna pata gum ho gaya hai
tumhare din men ik rudad thi jo kho ga.i hai
hamari raat men ik ḳhvab thaa, gum ho gaya hai
vo jis ke pech-o-ḳham men dastan lipTi hui thi
kahani men kahin vo majra gum ho gaya hai
zara ahl-e-junun aao hamen rasta sujhao
yahan ham aql valon ka ḳhuda gum ho gaya hai
nazar baaqi hai lekin tab-e-nazzara nahin ab
suḳhan baaqi hai lekin mudda.a gum ho gaya hai
mujhe dukh hai ki zaḳhm o ranj ke is jamghaTe men
tumhara aur mera vaqi.a gum ho gaya hai
ye shiddat dard ki us ke na hone se na hoti
yaqinan aur kuchh us ke siva gum ho gaya hai
vo jis ko khinchne se zaat ki parten khulengi
hamari zindagi ka vo sira gum ho gaya hai
vo dar va ho na ho, azad o ḳhud-bin ham kahan ke
palaT aa.en to samjho rasta gum ho gaya hai
Leave a Reply