tabib ho ke bhi dil ki dava nahin karte
ham apne zaḳhmon se koi dagha nahin karte
parinde uḌne lage hain ghurur ke tere
hava men kaghzi par se uḌa nahin karte
nakel Dalni hai nafs ke iradon par
bina lagam ke ghoḌe thama nahin karte
dua ko haath uThate nahin har ik ke liye
to ye bhi sach hai ki ham bad-dua nahin karte
ye surḳh andhiyan kya ‘chand’ ka bigaḌengi
buland peḌ hava se gira nahin karte
Leave a Reply