Ain Tabish
mujh ko na-karda gunah ka mo’tarif hona paḌa
rasm aisi thi ki ḳhud se munharif hona paḌa
koi bhi mujh sa na tha bebak bazm-e-shauq men
is tarah mujh ko sabhon se muḳhtalif hona paḌa
ek hi shai thi ki jis par bach raha tha e’timad
pas mujhe apni ana se muttasif hona paḌa
vo yaqinan raz-andar-raz tha lekin use
ek din mujh na-tavan par munkashif hona paḌa
kya bata.un ma.abad-e-tanhai men mujh rind ko
umr-bhar ke vaste kyuun mo.atakif hona paḌa
Leave a Reply