Iqbal Sajid
go dahr ke naqshe men hain bahar bhi nahin ham
rakhte hain nishan aur ujagar bhi nahin ham
kyuun ham se phir ummid-e-sadaf bandh rahe ho
jab tum ko pata hai ki samundar bhi nahin ham
ḳhushbu ki tarah phuul ke pinjre men nahin band
azad fazaon ka muqaddar bhi nahin ham
ehsas hai phir ḳhana-badoshi ka hamen kyuun
rahne ko Thikana bhi hai be-ghar bhi nahin ham
kaise ho ḳhad-o-ḳhal se pahchan hamari
ma.ani ki tarah lafz ke andar bhi nahin ham
parvaz sabab kaise ho bachchon ki ḳhushi ka
titli ki tarah mus.haf-e-gul par bhi nahin ham
is ka ye taqaza hai ki ahkam baja laa.en
jis husn ka sarkar ke naukar bhi nahin ham
Leave a Reply