jahan jahan bhi havas ka ye janvar jaa.e
dilon se mehr-o-mohabbat ki fasl char jaa.e
khule hain unchi haveli ke paltu kutte
faqir-e-rah zara dekh-bhal kar jaa.e
vahin se huun main jahan se dikha.i deta huun
vahin tilak huun jahan tak miri nazar jaa.e
hai koi der se us paar muntazir mera
ruka hua huun ki naddi zara utar jaa.e
vo bad-e-tund hai har peḌ ki ye koshish hai
hava ke saath koi dusra shajar jaa.e
hudud-e-zat se aage ḳhudaon ki had hai
men sochta huun agar zehn kaam kar jaa.e
bhari paḌi hai ufunat se inch inch zamin
is ek phuul ki ḳhushbu kidhar kidhar jaa.e
abhi talak tire raste men pul-sirat pe hai
guzarne vaala zaruri nahin guzar jaa.e
‘nasim’ gaanv ki masjid men raat kaTega
ik ajnabi sa musafir hai kis ke ghar jaa.e
Leave a Reply