Poet
har ek shaḳhs ko ik tantane men rakhti hai
vo bhant bhant ki machhli ghaḌe men rakhti hai
tamam shahr ke danishvaron ko vo zalim
asir-e-zulf kiye asare men rakhti hai
vo galiyan bhi agar de to sher-o-naghma lage
zaban men loch ajab sur gale men rakhti hai
use sharab-e-tuhura ka tazkira bhi gunah
ye baat aur hai sab ko nashe men rakhti hai
har ik ko dard ki lazzat se ashna kar ke
maze men rahti hai sab ko maze men rakhti hai
samajh ke haq vo har ehsan bhuul jaati hai
magar har ek ḳhata hafize men rakhti hai
use ḳhabar hai ki anjam-e-vasl kya hoga
vo qurbaton ki tapish fasle men rakhti hai
sukun ke saa.e men shayad use bhula baiThe
mudam shahr ko ik zalzale men rakhti hai
Leave a Reply