Ab Un Pe Meri Aah Ka Hoga Asar Kahan

ab un pe meri aah ka hoga asar kahan

kya haal hai mira unhen is ki ḳhabar kahan

ab un ke dil men ham se faqiron ka ghar kahan

bas dekhiye ke phirte hain ham dar-ba-dar kahan

ik mushkilon ki dhuup se mera hai samna

asaniyon ka raah men koi shajar kahan

muddat hui ke iid mayassar nahin hamen

aaya hai chand ham ko hamara nazar kahan

bas ai tabib nusḳha-e-didar likh mujhe

in marhamon se bharta hai zaḳhm-e-jigar kahan

har aan nafraton ka hai pahra gali gali

ab ham karen talash mohabbat-nagar kahan

har moḌ par hai ek musibat se samna

ab jaane ḳhatm hoga mira ye safar kahan

tarik ho chuki yahan ‘haidar’ ki zindagi

us ko nasib ishq ke shams-o-qamar kahan