ibrat-e-dahr ho gaya jab se chhupa mazar men
ḳhair jagah to mil ga.i dida-e-e’tibar men
toḌ raha hai baghban pankhuḌiyan bahar men
koi to ho fida-e-gul ek nahin mazar men
mahv huun yad-e-chehra-e-shahid-e-gul-azar men
ab ye ḳhizan-nasib dil ja ke mila bahar men
auj-e-nihad-e-taba ki miT ke bhi shaan rah ga.i
mar ke main su-e-asman mil ke uḌa ghubar men
mere libas-e-kohna se haTti nahin hai un ki aankh
shayad ulajh ga.i nazar jama-e-tar-tar men
tum ne shab-e-firaq men dekhin nahin jo halaten
aaj vo aa ke dekh lo alam-e-ehtizar men
jazb-e-shamim-e-zulf hai dana-e-dam se siva
saikḌon dil khinch aa.e hain gesu-e-mushk-bar men
faisla ho hi ja.ega chhanTne de bhiiḌ hashr ki
‘saqib’-e-dil-hazin hai aaj tu bhi kisi shumar men
Leave a Reply