hangam-e-nazaa mahv huun tere khayal ka
mushtaq huun farishta-e-sahib-jamal ka
pairahan us javan ne jo pahna hai chhal ka
milta nahin chaman men mizaj ik nihal ka
aluda be-gunahon ke khuun se hai tegh-e-charkh
na-fahmon ko guman hai shafaq men hilal ka
shana banenge baad-e-fana apne ustukhan
uqda khulega gesuon ke baal baal ka
biini suhail mushtari o zohra gosh hain
qutub-e-shumal-e-husn hai til tere gaal ka
kis kis bashar ko laai hai duniya fareb men
kya kya javan murid hai us pir-zal ka
laati hai vaan qaza-o-qadar murgh-e-ruh ko
paani jahan qafas ka hai daana hai jaal ka
amrad-parast hai to gulistan ki sair kar
har naunihal rashk hai yaan khurd-sal ka
ik dam main ja milunga azizan-e-rafta se
kya arsa hai zamana-e-mazi se haal ka
surkh o safed rang se hota hai ashkar
vo jism-e-naznin hai abiir o gulal ka
ai dil qaza na aae idhar tiktiki na bandh
goli ka samna hai ye nazzara khaal ka
bosa diye se husn men hogi kami na yaar
hota nahin zakat se nuqsan maal ka
vo chashm hi nahin dil-e-vahshi ki fikr men
har turk ko hai shauq shikar-e-ghazal ka
zanjir o tauq har baras aa kar pinha gai
divana huun main bad-e-bahari ki chaal ka
roz-e-siyah hijr men mere jale charagh
parvanon ko nasib hua din visal ka
rone ke badle haal par apne hansa kiye
parda hua na faash hamare malal ka
dikhlaya be-naqab jise banda ho gaya
vo ru-e-sada-naqsh hai sahib kamal ka
karti hai yaan zaban-e-kamar yaar men kalam
maadum hai javab hamare saval ka
‘atish’ lahad se utthunga kahta ye roz-e-hashr
mushtaq huun main yaar ke husn-o-jamal ka
Leave a Reply